Landsvirkjun hagnaðist um 13,3 milljarða króna á fyrstu níu mánuðum ársins, en árið áður nam hagnaður sama tímabils 8 milljörðum króna. Hagnaður fyrir óinnleysta fjármagnsliði nam 20 milljörðum króna og hækkaði um 66,6% frá sama tímabili í fyrra. Þetta kemur fram í afkomutilkynningu Landsvirkjunar.

Rekstrartekjur Landsvirkjunar námu 51,6 milljörðum króna og hækkuðu um 21% frá sama tímabili árið áður. Nettó skuldir lækkuðu um 18 milljarða frá áramótum og voru í lok september 199,9 milljarðar króna. Handbært fé frá rekstri nam 31,1 milljarði króna, sem er um 40,8% hækkun frá sama tímabili í fyrra.

„Rekstrarumhverfi fyrirtækisins hélt áfram að batna á þriðja fjórðungi ársins. Hagur viðskiptavina hélt áfram að vænkast, en þeir hafa jafnt og þétt aukið raforkunotkun sína og keyra flestir á fullum afköstum, auk þess sem spurn eftir framleiðslu þeirra hefur náð fyrri styrk og er í mörgum tilvikum meiri en hún var í upphafi faraldursins. Raforkukerfi Landsvirkjunar nálgast það nú að vera fullnýtt.

Meðalálverð á tímabilinu var nærri helmingi hærra en á sama tíma árið áður, auk þess sem raforkuverð á Nord Pool markaðinum fimmfaldaðist, eftir sögulega lágt verð í fyrra. Þar sem hluti samninga okkar við stórnotendur er bundinn við þessar tvær breytur hækkuðu tekjur mikið, eða um 69 milljónir dollara miðað við sama tímabil árið 2020.

Afkoma fyrstu níu mánuðina ber þessa bata greinileg merki. Hagnaður fyrir óinnleysta fjármagnsliði, sem er sá mælikvarði sem við lítum til við mat á rekstri fyrirtækisins, hækkaði um tæplega 67% frá sama tímabili árið 2020. Nettó skuldir héldu áfram að lækka og voru í lok fjórðungsins 18 milljörðum króna lægri en um síðustu áramót.

Rekstur aflstöðva gekk vel á tímabilinu. Innrennsli í miðlunarlón Landsvirkjunar á Suðurlandi var þó  með minnsta móti í sumar. Sem fyrr var mikill kraftur í nýsköpunarstarfi í tengslum við fyrirtækið víðs vegar um land, til að mynda undirbúningi að rafeldsneytisframleiðslu, sem getur orðið lykilþáttur í því að gera þjóðina óháða jarðefnaeldsneyti, en vinnsla Landsvirkjunar á endurnýjanlegri orku er sem fyrr mikilvægt framlag til loftslagsmála,“ er haft eftir Herði Arnarsyni, forstjóra Landsvirkjunar, í afkomutilkynningu.