Félagið Einn á móti X ehf. var í Landsrétti fyrir helgi dæmt til að greiða frístundabyggðinni Ásum 15 þúsund krónur. Dæmd fjárhæð í Landsrétti var þriðjungur af því sem héraðsdómur kvað á um en við upphæðina bætast 800 þúsund krónur í málskostnað. Alls hefur málareksturinn kostað félagið 1.800 þúsund í málskostnað til gagnaðila.
Umrædd frístundabyggð er í landi Fells í Bláskógabyggð en lögum samkvæmt er eigendum sumarhúsa lögskylt að eiga aðild að félagi eigenda. Umrætt félag afréð fyrir nokkru að setja upp hlið að sumarhúsalóðunum og senda reikning fyrir því á félagsmenn. Þann reikning vildi Einn á móti X ekki greiða – rétt er að geta þess að því var gert með dómi að greiða 15 þúsund krónur vegna þess – og lýsti eigandi þess því yfir að hvorki hann né félagið væru lengur félagsmenn í Ásum.
- Sjá meira: Málskostnaður 27-faldaði kröfuna
Dómsmálið nú varðaði skyldu félagsins til að greiða árgjald til Ása, 15 þúsund krónur ár hvert, en Einn á móti X taldi sér ekki skylt að greiða það með vísan til félagafrelsisákvæðis stjórnarskrárinnar. Þá var einnig byggt á sýknu sökum aðildarskorts þar sem félagið hefði leigt lóðina áfram til eiganda síns og þar með ætti eigandi félagsins, en ekki félagið sjálft, að standa skil á gjaldinu. Ekki var fallist á það í héraði og félagið dæmt til að greiða þriggja ára árgjöld auk milljónar í málskostnað til gagnaðila.
Í dómi Landsréttar segir að ekkert bendi til þess að ákvörðun um árgjöld hafi verið tekin með ólögmætum hætti. Þá væri ekki með neinu móti sýnt fram á að Ásar hefðu sýnt af sér ólögmæta háttsemi eða farið út fyrir hlutverk sitt og þaðan af síður hvernig slíkt ætti að leiða til þess að ekki væri heimilt að innheimta gjaldið. Enn fremur væri engin ástæða til að ætla að skylduaðild að félaginu væri ósamræmanleg stjórnarskránni.
Landsréttur féllst aftur á móti á að árin 2017 og 2018 hefði eigandi Einn á móti X verið umráðamaður lóðarinnar og þar með væri ekki unnt að krefja félagið um greiðslu árgjalda vegna þeirra ára. Ásar höfðu ekki áfrýjað dómi héraðsdóms hvað eiganda Eins á móti X varðaði og var því hafnað að kröfur gagnvart honum kæmust að fyrir dóminum. Var Einn á móti X því aðeins dæmt til að greiða árgjald ársins 2016, alls 15 þúsund krónur.
Sem fyrr segir var Einn á móti X dæmt til að greiða eina milljón króna í málskostnað í héraði og nú bætast við 800 þúsund krónur fyrir Landsrétti. Málskostnaður félagsins er því 120-falt hærri en hin dæmda fjárhæð. Málskostnaður milli eiganda félagsins og Ása var aftur á móti látinn falla niður fyrir Landsrétti. Við það bætist sennilega þóknun til eigin lögmanns.
