Sektir vegna óskráðrar heimagistingar undanfarna tvo mánuði nema nærri 40 milljónum króna samkvæmt svari Þórdísar Kolbrúnar Reykfjörð Gylfadóttur, ferðamála-, iðnaðar- og nýsköpunarráðherra við fyrirspurn Maríu Hjálmarsdóttur, varaþingmanns Samfylkingarinnar á Alþingi.
Um mitt sumar ákvað Þórdís Kolbrún að leggja 64 milljónir króna í árslangt átak til að fylgjast með hvort heimagisting væri skráð hjá Sýslumanni líkt og lög kveða á um, til dæmis af íbúðum á vefnum Airbnb. Frá ársbyrjun 2017 gat fólk leigt út eigin húsnæði í 90 daga á ári gegn ef það skráði húsnæðið hjá Sýslumanni.
Síðan þá hefur lögregla stöðvað starfsemi þriggja rekstrarleyfisskyldra gististaða á höfuðborgarsvæðinu. Þá hefur heimagistingarvakt óskað eftir lögreglurannsókn eða lokun á átta rekstrarleyfisskyldum gististöðum utan höfuðborgarsvæðisins. Um miðjan september hóf sýslumaður að sekta vegna brota á reglunum en þann 7. nóvember námu sektirnar 39,6 milljónum króna. Þá hafa skráningar fóru hins vegar hægt af stað en á þessu ári hefur heimagistingum þó fjölgað um 80% prósent miðað við árið 2017.
Þórdís Kolbrún segir að grípa eigi til frekari aðgerða. Á næstunni verði lagt fram frumvarp sem veiti sýslumanni frekari heimildir til að beita sér vegna lögbrota þó formlegt eftirlit verði áfram hjá lögreglu. „Það að færa beitingu viðurlaga, í formi stjórnvaldssekta, til sýslumannsins á höfuðborgarsvæðinu leiðir til samræmingar á málsmeðferð og til einföldunar og aukinnar skilvirkni í málum sem varða ólögmæta gististarfsemi. Markmiðið er eftir sem áður að fækka lögbrotum, en hingað til hafa brot á reglum um rekstrarleyfisskylda gististarfsemi í atvinnuskyni sjaldnast leitt til útgáfu ákæru. Má það að hluta rekja til þess að lögregla þarf að forgangsraða verkefnum, m.a. með tilliti til alvarleika afbrota og öryggis- og löggæslusjónarmiða,“ segir í svari ferðamálaráðherra.
