Advania-samsteypan hefur fest kaup á breska fyrirtækinu Azzure IT sem sérhæfir sig viðskiptakerfum Microsoft í skýinu. Í tilkynningu frá Advania segir að gríðarleg samkeppni sé um sérfræðinga á þessu sviði. Azzure IT er staðsett í Sheffield og þar starfa um 60 sérfræðingar sem nú verða hluti af Advania.
„Azzure IT er leiðandi á breskum markaði í þjónustu á viðskiptakerfum Microsoft. Markmið kaupanna er að geta boðið viðskiptavinum Advania enn betri þjónustu og ráðgjöf á sviði viðskiptalausna,“ segir í tilkynningunni.
Advania hóf starfsemi í Bretlandi í fyrra með kaupum á upplýsingatæknifélaginu Content+Cloud sem sérhæfði sig í viðskiptalausnum og var stærsti samstarfsaðili Microsoft þar í landi.
„Með Azzure IT-viðbótinni verðum við einn stærsti samstarfsaðili Microsoft í Norður-Evrópu með breytt vöruframboð og mikla sérhæfingu sem nýtist okkar viðskiptavinum. Það er gleðilegt að fá svo öflugan liðsauka í sérfræðiteymi Advania á sviði viðskiptalausna,” segir Heimir Fannar Gunnlaugsson , framkvæmdastjóri viðskiptalausna Advania á Íslandi.
