Advania og Vertonet, hagsmunasamtök kvenna í upplýsingatækni, hyggjast vinna saman að því að auka hlutfall kvenna í tæknigeiranum, samkvæmt sameiginlegri tilkynningu nú í morgun. Advania hefur gerst einn af bakhjörlum samtakanna og mun taka þátt í viðburðum til að efla samstöðu kvenna í greininni.
Megin tilgangur Vertonet er að „vinda ofan af þeim kynjahalla sem nú ríkir í greininni og vekja áhuga kvenna á þeim fjölbreyttu störfum sem rúmast innan geirans.“
Samkvæmt tilkynningunni ríma hugmyndir samtakanna við markmið Advania um að auka veg kvenna í starfsstéttinni. Það er sagt vera „allra hagur að sem fjölbreyttastur hópur fólks komi að þróun tæknilausna framtíðarinnar.“
Sett hefur verið saman aðgerðaráætlun og dagskrá á næstu mánuðum með það að markmiði að konum í geiranum gefist færi á að kynnast betur og efla tengslanetið, en fyrsti viðburðurinn verður nú í September.
„Við teljum nauðsynlegt að auka fjölbreytni í starfsgreininni og fá fleiri konur að borðinu til að þróa og rýna í tæknilausnir framtíðarinnar. Í tæknigeiranum eru gríðarlega fjölbreytt störf sem kalla á ólíka sýn og reynslu. Hraðinn í upplýsingatæknigeiranum er mikill og því fylgja miklir möguleikar til starfsþróunar og sérhæfingar. Fólk sem hefur áhuga á spennandi starfsumhverfi ætti að kynna sér fjölbreyttnina í tæknigeiranum,“ segir Sesselía Birgisdóttir, markaðsstjóri Advania.
