Álverð hækkaði um 2,9% og náði 2.726 dölum á tonn í morgun. Verð á áli hefur hækkað um 40% í ár á London Metal Exchange markaðnum og hefur ekki verið hærra frá árinu 2011.
Verðhækkunin hefur ýtt undir verðbólguvæntingar markaðsaðila en fjármálafyrirtækin Goldman Sachs, Citigroup og Trafigura spá öll frekari hækkunum á næstunni.
Í umfjöllun Bloomberg segir að framboð af málminum fylgi ekki eftirspurn, sér í lagi þar sem stjórnvöld í Kína, sem framleiðir um 60% af áli í heiminum, reyna nú að bregðast við kolefnislosun í iðnaðinum. Jafnframt segir að nærri tíu ára tímabil af offramleiðslu gæti verið á enda.
„Fjöldi reglugerða hafa nýlega tekið gildi sem hefur áhrif á framleiðslu áls og ýtir verðinu upp fyrir vikið,“ er haft eftir greinanda TF Futures Co. „Búist er við að stefnur á borð við efri mörk orkunotkunar verði í gildi út árið,“ og bætir við að verðin muni að öllum líkindum hækka svo lengi sem eftirspurn dregst ekki saman.
Hækkandi álverð hefur haft jákvæð áhrif á afkomu Orkuveitu Reykjavíkur sem hagnaðist um 8,8 milljarða á fyrri helmingi ársins . Í uppgjöri OR kom fram að verðmæti langtímasamninga, sem tengdir eru við álverð, hafi sveiflast upp um 11,2 milljarða milli ára.
Aluminum prices have risen almost 40% this year on the LME. https://t.co/yWD0I1yECY pic.twitter.com/IhaJD53mmX
— Lisa Abramowicz (@lisaabramowicz1) August 31, 2021