Stjórn Arion banka hefur lagt fram tillögu fyrir hluthafafund að bankinn greiði allt 25 milljarða í arð, takist Kaupþingi að selja minnst tveggja prósenta hlut í Arion banka fyrir 15. apríl.
Þá hefur einnig verið lagt fyrir hluthafafundinn, sem fara á fram þann 12. febrúar, að Arion banki fái að kaupa allt að 10% eigin bréfa í bankanum fram til 15. apríl og greiða fyrir allt að 18,8 milljarða króna. Það fé sem nýtt verður til kaupa á eigin bréfum dregst frá væntri 25 milljarða arðgreiðslu bankans.
Kaupverð Arion banka fyrir eigin hluti skal að hámarki nema 94,177 krónum á hlut sem samsvarar um 0,85 krónum fyrir hverja krónu af eigin fé miðað við nýjast uppgjör Arion banka, sem miðast við lok september 2017.
Kaupþing hefur lagt mikið kapp á að selja Arion banka, sem er stærsta óselda eign Kaupþings, sem fyrst og er stefnt á skráningu bankans á markað í vor.
Með arðgreiðslunum lækkar eigið fé Arion banka og því vænt kaupverð bankans þar sem íslenska ríkið á forkaupsrétt á hlutum í Arion banka sé kaupverð undir 0,8 krónum fyrir hverja krónu af eigin fé.
Líkt og Viðskiptablaðið greindi frá hefur Kaupþing átt í viðræðum við lífeyrissjóði um kaup á hlut í Arion banka. Tveimur dögum eftir hluthafafundinn, þann 14. febrúar, verður ársuppgjör Arion banka birt.
Fréttablaðið hefur bent á að Kaupþing hafi lagt hart að lífeyrissjóðunum að ganga frá hugsanlegum kaupum fyrir birtingu ársuppgjörsins. Með því móti má miða við eigið fé Arion banka í lok september 2017 en ekki um áramót, og þar með greiða lægra kaupverð án þess að forkaupsréttur ríkisins virkist.
Arion banki er að 57% hlut í eigu Kaupþings í gegnum félagið Kaupskil ehf., Goldman Sachs og þrír vogunarsjóðir eiga samtals nálægt 30% hlut og 13% hlutur í bankanum er í eigu íslenska ríkisins.
