Stjórn Bankasýslu ríkisins segist vera að skoða lagalega stöðu sína gagnvart söluaðilum í útboði á 22,5% hlut í Íslandsbanka sem fór fram fyrir rúmum mánuði. Bankasýslan „mun að óbreyttu ekki greiða umsamda söluþóknun í tilvikum þar sem ágallar voru við sölu á 22,5% hlut ríkisins til hæfra fagfjárfesta“, segir í tilkynningu frá stjórn Bankasýslunnar.

Fjármálaeftirlit Seðlabanka Íslands hefur hafið athugun á tilteknum þáttum tengdum útboði og starfsháttum söluráðgjafa í sölumeðferðinni.

„Komi í ljós að einhverjir söluaðilar hafi ekki staðið undir því trausti sem Bankasýslan gerði til þeirra mun það hafa áhrif á söluþóknanir til þeirra,“ segir í tilkynningunni.

Stjórn Bankasýslunnar segir að upp hafi komið vafi um hvort kröfum um hæfi fjárfesta hafi verið fylgt eftir af þeim fjármálafyrirtækjum sem sáu um sölu á hlut ríkisins í áðurnefndu útboði. Einnig séu til athugunar mögulegir hagsmunaárekstrar einstakra söluaðila við kaup starfsmanna eða tengdra aðila á hlutum í bankanum.

Bankasýslan segir að hvergi í þeim lögum sem um hana gilda sé að finna heimildir til eftirgrennslan eða athugunar á framangreindum atriðum sem eru nú til skoðunar Fjármálaeftirlitinu. „Bankasýsla ríkisins fagnar þeirri athugun.“

Sjá einnig: Ætla að leggja niður Bankasýsluna

Í morgun sendu formenn ríkisstjórnarflokkanna frá sér sameiginlega yfirlýsingu þar sem fram kom að til stendur að leggja niður Bankasýsluna og innleiða nýtt fyrirkomulag til að halda utan um eignarhluta ríkisins í fjármálafyrirtækjum. Ekki verður ráðist í frekari sölu á hlutum ríkisins í Íslandsbanka þar til ný löggjöf liggur fyrir.

Tilkynningin frá stjórn Bankasýslunnar í heild sinni:

Athugasemd frá stjórn Bankasýslu ríkisins vegna nýafstaðins útboðs á 22,5% hlut ríkisins í Íslandsbanka

Undanfarið hefur framkvæmd útboðs sem fram fór 22. mars sl. við sölu á 22,5% hlut ríkisins í Íslandsbanka verið harðlega gagnrýnt. Um var að ræða lokað útboð sem eingöngu var ætlað hæfum fagfjárfestum. Upp hefur komið vafi um hvort kröfum um hæfi fjárfesta hafi verið fylgt eftir af þeim fjármálafyrirtækjum sem sáu um sölu á hlut ríkisins í áðurnefndu útboði. Einnig eru til athugunar mögulegir hagsmunaárekstrar einstakra söluaðila við kaup starfsmanna eða tengdra aðila á hlutum í bankanum.

Bankasýsla ríkisins fer með eignarhluti ríkisins í fjármálafyrirtækjum skv. lögum nr. 88/2009 og gegnir hlutverki í sölumeðferð þeirra skv. lögum nr. 155/2012.  Hvergi í þeim lögum hefur stofnunin heimildir til eftirgrennslan eða athugunar á framangreindum atriðum. Fjármálaeftirlitið hefur aftur á móti slíkar heimildir skv. lögum og hefur það nú hafið athugun á áðurnefndum þáttum tengdum útboðinu og mun skila niðurstöðu innan fárra vikna. Bankasýsla ríkisins fagnar þeirri athugun.

Lagaleg staða söluaðila til skoðunar

Fjármálaeftirlitið skoðar meðal annars hæfi þeirra fagfjárfesta sem fengu að kaupa en það var hlutverk söluaðila að meta það enn ekki Bankasýslu ríkisins.  Komi í ljós að einhverjir söluaðilar hafi ekki staðið undir því trausti sem Bankasýslan gerði til þeirra mun það hafa áhrif á söluþóknanir til þeirra. Stjórn Bankasýslu ríkisins skoðar nú lagalega stöðu sína gagnvart söluaðilum og mun að óbreyttu ekki greiða umsamda söluþóknum í tilvikum þar sem ágallar voru við sölu á 22,5% hlut ríkisins til hæfra fagfjárfesta.

Lárus L. Blöndal, stjórnarformaður
Margrét Kristmannsdóttir
Vilhjálmur Bjarnason