Olíu- og bensíngjald verður jafnað á næsta ári samkvæmt fjárlagafrumvarpi ársins 2018, sem kynnt var fyrr í morgun. Það verður til þess að bensínlítrinn kemur til með að hækka um 8 krónur og dísillítrinn mun hækka um 18 krónur. Breytingarnar taka gildi þann 1. janúar 2018.

Í fyrirlestri sem að Benedikt Jóhannesson, fjármála- og efnahagsráðherra, hélt í morgun kom fram að hluti af stefnu stjórnvalda um umhverfisvernd og loftslagsmál fælu í sér svokallaða græna skatta. Það þýðir meðal annars að virðisaukaskattur verði felldur niður við innflutning eða kaup á vistvænni bifreið. Einnig verða frekari skref undirbúin; Uppbygging innviða, sem og nýir hvatar fyrir einstaklinga og fyrirtæki og aðgerðaáætlun í loftslagsmálum.

Þar kemur fram að olíugjald verður hækkað umfram bensíngjald. Talið var að betra væri fyrir umhverfið að nota dísil og því voru lægri gjöld á það eldsneyti. Nú hafa rannsóknir bent til þess að dísilolía væri slæm fyrir umhverfið. Að sögn fjármálaráðherra mun breytingin skila ríkissjóði 1,7 milljörðum króna í ríkiskassann.