Samskip bætir við siglingaleið til Osló, Póllands og Litháen. Segir fyrirtækið að með þessu hafi flutningsleiðir milli Íslands og Póllands verið stórbættar með nýjum samstarfssamningum og nýrri siglingaleið í Eystrasalti.

Nýja siglingaleiðin fer til Klaipeda í Litháen, Gdynia í Póllandi og Ósló í Noregi en boðið er upp á hana í samstarfi við flutningafyrirtæki á svæðinu sem hófst í byrjun apríl. Tengist siglingaleiðin flutningakerfi Samskipa í Árósum í Danmörku.

Birgir Gunnarsson, framkvæmdastjóri innflutningssviðs Samskipa á Íslandi segir að kallað hafi verið eftir bættum tengingum á svæðið enda hafi umtalsverð aukning verið á innflutningi frá bæði Póllandi og löndum Eystrasaltsins síðustu ár, til að mynda á varningi tengdum byggingariðnaði.

„Sendingar taka mun skemmri tíma en áður og leitun er að hagkvæmari sendingarmáta,“ segir Birgir en Samskip eru með skrifstofu í Gdansk í Póllandi sem annast þjónustu við pólska sendendur á vörum til Íslands, svo sem vegna forflutninga, lestunar gáma og skjalagerðar.

Lagt er upp frá Klaipeda í Litháen og siglt til Gdynia í Póllandi, áður en haldið er áfram til Ósló í Noregi og þaðan til Árósa í Danmörku þar sem er umskipað. Þaðan liggur leiðin til Reykjavíkur með viðkomu í Varberg í Svíþjóð og Kollafirði í Færeyjum.

Um Samskip:

Samskip eru alþjóðlegt flutningafyrirtæki sem býður flutningalausnir og tengda þjónustu á landi, sjó og í lofti með hagkvæmni og sjálfbærni að leiðarljósi.

Samskip bjóða upp á heildarþjónustu á Íslandi og í Færeyjum, fjölþátta gámaflutningsþjónustu um alla Evrópu, og frystiflutninga og flutningsmiðlun um allan heim. Félagið starfrækir skrifstofur í yfir 20 löndum í fimm heimsálfum. Starfsmenn er um 1.300.