Ungverska lággjaldaflugfélagið Wizz Air telur að farþegafjöldi muni í næsta mánuði ná sömu hæðum og áður en faraldurinn skall á. Guardian greinir frá.
Félagið er bjartsýnt þrátt fyrir 114 milljóna evra tap á öðrum ársfjórðungi þessa árs og væntir þess að sætanýting verði um 90% af því sem hún var í júlí, áður en faraldurinn teygði anga sína til Evrópu, og 100% af því sem hún var í ágúst.
Félagið býst þar með við að verða fyrsta stóra evrópska flugfélagið til að endurheimta sama farþegafjölda og áður en faraldurinn brast á. Félagið flutti um 2,9 milljónir farþega á síðasta fjórðungi sem er um fjórfalt meira en það gerði á sama tímabili í fyrra.
Félagið hefur ráðið inn 600 manns til að sinna eftirspurn en félagið þurfti að segja upp um þúsund manns í apríl í fyrra þegar að ljóst var í hvað stefndi.
Wizz Air er ekki eina flugfélagið til að sækja í sig veðrið í sumartörninni. Breska lággjaldaflugfélagið easyJet segir að í sumar verði sætanýting um 60% af því sem hún var áður en faraldurinn skall á.
Þá hefur Ryanair sagt að fjöldi farþega á þessu reikningsári, sem hófst í lok mars, verði um 100 milljónir manna miðað við 27,5 milljónir á síðasta reikningsári. Áður en faraldurinn brast á flutti félagið um 150 milljónir manna.
Wizz Air hefur um nokkurt skeið flogið til Íslands en félagið flýgur til landsins frá Austurríki, Ungverjalandi, Ítalíu, Þýskalandi, Póllandi og Lettlandi.
