Íslenska lyfjafyrirtækið Coripharma hefur til skoðunar að fara á First North-markaðinn í Kauphöllinni á komandi mánuðum. Einnig kemur skráning á erlendan hlutabréfamarkað til greina. Þetta staðfestir Bjarni Þorvarðarson, stjórnarformaður og einn af stærri hluthöfum fyrirtækisins, við Markaðinn .
Verði af skráningunni, þá hefur Coripharma í hug að sækja sér allt að 3-5 milljarða króna í nýtt hlutafé. Þá yrðu viðskipta- og fjárfestingaáætlanir lyfjafyrirtækisins fullfjármagnaðar að hans sögn.
Coripharma hóf í byrjun júlí sölu á flogaveikilyfinu Eslicarbazepine sem er fyrsta samheitalyfið sem félagið þróar.
„Ástæðan fyrir því að skráning er nú til skoðunar hjá félaginu, ásamt öðrum kostum eins og hlutafjáraukningu í gegnum lokað útboð, er að við höfum fundið fyrir miklum áhuga fjárfesta, sem almennt fjárfesta einungis í skráðum fyrirtækjum, á að koma að Coripharma. Þetta á einkum við núna eftir að fyrsta lyfið sem Coripharma þróaði er komið á markað í Evrópu,“ hefur Markaðurinn eftir Bjarna.
Samheitalyfjafyrirtækið sótti sér 2,5 milljarða króna í hlutafjáraukningu í marsmánuði. Framtakssjóðurinn Iðunn, í stýringu hjá Kvika eignastýringu, kom þá inn í hluthafahópinn með 19% hlut og varð jafnframt stærsti hluthafi fyrirtækisins. Meðal annarra stærstu hluthafa Coripharma eru BKP Invest, sem er í meirihlutaeigu framangreinds Bjarna, framtakssjóðurinn TFII, VÍS og Snæból.
