Einkaneysla landsmanna virðist hafa rétt heldur úr kútnum á vormánuðum ef marka má þróun kortaveltu. Þetta er meðal þess sem fram kemur í Morgunkorni Íslandsbanka .

Þar segir að vöxtur einkaneyslu verði þó með minna móti í ár enda eru skilyrði í hagkerfinu til skemmri tíma óhagstæðari en verið hefur síðustu ár.

Hægari einkaneysluvöxtur í kortunum

„Kortveltutölur maímánaðar bera með sér að neyslugleði landsmanna hafi eitthvað tekið við sér með vori í lofti. Var raunaukning kortaveltunnar að jafnaði 1,8% í apríl og maí frá sama tíma í fyrra, samanborið við 0,8% vöxt á fyrsta fjórðungi ársins," segir í Korninu.

„Þetta virðist einnig ríma allvel við þróun væntinga heimilanna, en Væntingavísitala Gallup var að jafnaði  nærri 14 stigum hærri í apríl og maí en hún var á lokafjórðungi síðasta árs."

Þá segir jafnframt að hægur vöxtur einkaneyslu þurfi alls ekki að þýða harðindi fyrir landsmenn.