Heildarkostnaður við byggingu og endurbætur á höfuðstöðvum Orkuveitu Reykjavíkur munu samsvara ríflega 15 milljörðum íslenskra króna eftir algerar endurbætur á leku vesturhúsi höfuðstöðvanna á Bæjarhálsi fyrir ríflega 3 milljarða verður lokið.
Það er þreföld kostnaðaráætlun hússins miðað við verðlag dagsins í dag, en strax í upphafi fór kostnaðaráætlun við byggingu hússins ríflega tvöfalt fram úr áætlun. Endurbygging höfuðstöðva OR er ætlað að ljúka sumarið 2023, en útboð vegna vinnu við endurbyggingu eins af húsum Orkuveitu Reykjavíkur við Bæjarháls í Reykjavík er nú hafið.
Áður hafði endurhönnun þess verið boðin út, sem fara þurfti út í vegna mikilla rakaskemmda á vesturhluta höfuðstöðvanna, sem byggðar voru með nýstárlega yfirhallandi útveggjum, en nú verða útveggirnir byggðir á hefðbundinn lóðréttan hátt.
- Sjá einnig: Húsið sem lekur peningum
Upphafleg kostnaðaráætlun 2,3 milljarðar
Eins og sagt var frá í fréttum haustið 2017 þá sagði húsasmíðameistari að viðvaranir hans um ónýt gólf í húsinu hefðu verið hunsaðar og hann látinn leggja parket á hráblautt gólf sem skipta þurfti um fljótlega á ný.
Upphafleg kostnaðaráætlun á byggingu höfuðstöðvanna hljóðaði upp á 2,3 milljarða árið 2002, sem samsvarar ríflega 5 milljörðum króna á verðlagi dagsins í dag.
Í skýrslu úttektarnefndar um OR frá árinu 2012 kom fram að árið 2010 hefði heildarkostnaðurinn við framkvæmdina numið 8,5 milljörðum króna, sem samsvarar 11,6 milljörðum króna á verðlagi dagsins í dag.
Eftir að húsið var selt árið 2013 á 5,1 milljarð króna , og endurleigt til 20 ára, ákvað Orkuveitan að kaupa húsið á ný árið 2017 á ný á 5,5 milljarða , þó húsið væri mikið til ónýtt því samkvæmt sölusamningnum hafði Orkuveitan áfram borið ábyrgð á viðhaldi hússins.
- Sjá einnig: Hörmungarsaga Orkuveituhússins
Endurbætur fyrir hálfan milljarð skiluðu engu
Árið 2015 uppgötvuðust alvarlegar rakaskemmdir í útveggjum hússins, til viðbótar við leka sem vitað var um árið 2004 og 2009. Við tók langt og strangt ferli sem nú sér loks fyrir endann á segir í tilkynningu Orkuveitunnar, en árið 2016 var farið í viðgerðir sem kostuðu 460 milljónir á húsinu en þær skiluðu ekki árangri.
Eftir ítarlega valkostagreiningu var ákveðið að fjarlægja útveggina og byggja nýja lóðrétta útveggi í stað þeirra slútandi sem nú eru, en eins og Viðskiptablaðið sagði frá voru um sumarið 2017 lagðar fram sex mögulegar lausnir á vanda hússins.
Þær lausnir sem fela í sér niðurrif og endurbyggingu útveggja vesturhússins eins og farið verður í voru sagðar hljóða upp á 2,4 til 2,9 milljarða króna á verðlagi ársins 2017, sem miðað við verðlag dagsins í dag samsvarar allt að 3,2 milljarða króna.
Vonast er til að hægt verði að skrifa undir verksamninga á vordögum 2021 og endurbyggt hús verði tilbúið um sumarið 2023. Þar með mun húsið kosta á verðlagi dagsins í dag um 15,3 milljarða króna í byggingarkostnað, viðhaldi og endurbótum ef allt ofandregið er tekið saman.
- Sjá einnig: „Þú gast farið í sturtu undir þessu"
Myndband sýnir breytingar á húsnæðinu
Burðarvirki hússins er ekki í útveggjunum heldur í súlum og gólfum og því er hægt að skipta um veggina. Við hönnun endurbyggingarinnar var lögð áhersla á hógværara útlit hússins, hagkvæmni, notagildi og sveigjanleika sem þjónar starfsemi OR og viðskiptavina til framtíðar.
Orkuveita Reykjavíkur segist hafa kappkostað að miðla upplýsingum til almennings um framgang verksins og í eðlilegu árferði hefði verið boðað til blaðamannafundar þar sem endurbæturnar væru kynntar og spurningum svarað.
Vegna kórónuveirufaraldursins hafi hins vegar sú leið verið farin að útbúa myndband þar sem þeir Bjarni Bjarnason forstjóri og Grettir Haraldsson verkefnisstjóri fara yfir stöðuna og skrefin fram undan.
Jafnframt sýni myndbandið hvernig útlit þessa áberandi húss mun breytast, en myndbandið er að finna á sérstakri upplýsingasíðu um framkvæmdina á vef OR. Þar er einnig að finna ljósmyndir og nánari upplýsingar um tjónið sem varð á húsinu.
Hér má sjá frekari fréttir af byggingarsögu höfuðstöðva OR:
- 25. nóvember 2017 - Dýrasta regnkápa á Íslandi?
- 20. nóvember 2017 - Orkuveitan kaupir höfuðstöðvarnar aftur
- 7. október 2017 - OR skoðar að kaupa höfuðstöðvarnar aftur
- 6. september 2017 - „Þú gast farið í sturtu undir þessu"
- 2. september 2017 - Húsið selt á 5,1 milljarð
- 2. september 2017 - Húsið sem lekur peningum
- 28. júlí 2016 - Hörmungarsaga Orkuveituhússins
- 9. október 2013 - Straumur búinn að fjármagna kaup á Orkuveituhúsinu
- 18. september 2013 - Ekkert heyrist frá Straumi um kaup á Orkuveituhúsinu
- 24. ágúst 2013 - Ekki búið að selja Orkuveituhúsið
- 10. október 2012 - Bygging höfuðstöðva OR lítið rædd í stjórn
- 28. janúar 2012 - Austurálma Orkuveituhússins til sölu