Um sjö af hundraði landsmanna glíma þessi misserin við íþyngjandi greiðslubyrði en árið 2015 var hlutfallið 11%. Þetta er meðal þess sem kemur fram í nýrri skýrslu Íslandsbanka um fasteignamarkaðinn, en þar er talað um að greiðslubyrgði sé íþyngjandi þegar 40% eða hærra hlutfall útborgaðra launa fer í að þjónusta skuldir.

Ástæðan á bak við þessa fækkun rekur greiningardeildin til þess að dregið hafi úr skuldsetningu og vaxtaumhverfi hafi þróast í átt að lægri vöxtum.

„Þá hafa laun hækkað umtalsvert líkt og greint hefur verið frá. Hefur því hlutfall ráðstöfunartekna landsmanna sem varið er í vaxtagjöld og afborganir skulda lækkað talsvert og samhliða því skapast svigrúm hjá fleiri aðilum til að verja auknum hluta ráðstöfunartekna til neyslu og/eða sparnaðar,“ segir í skýrslu Íslandsbanka.

„Þegar greiðslubyrði skulda sem hlutfall af ráðstöfunartekjum er skoðuð eftir fjölskyldugerð lítur út fyrir að einstæðir karlmenn séu sá hópur sem í hvað flestum tilvikum býr við íþyngjandi greiðslubyrði. Hlutfall einstæðra karlmanna sem búa við íþyngjandi greiðslubyrði nemur 10,4% og er rúmlega tvöfalt hærra en hjá einstæðum konum og hjónum eða sambúðarfólki í sömu aðstæðum. Jafnframt er algengast að byrðin sé íþyngjandi á meðal fólks á aldrinum 35–64 ára. Þannig má leiða líkum að því að óheilbrigð skuldsetning sé hvað algengust hér á landi hjá einstæðum karlmönnum á áðurgreindu aldursbili.

Gefur þetta tilefni til að skoða betur hvað veldur slíkum fjárhagslegum aðstöðumun á milli mismunandi fjölskylduforma.“

íslandsbanki um fasteignamarkaðinn sept 2019
íslandsbanki um fasteignamarkaðinn sept 2019