Gjaldeyrisútboð Seðlabanka Íslands og peningaþvætti voru til umræðu á Alþingi í gær og spurði Þórhildur Sunna, þingmaður Pírata, forsætisráðherra hvort ekki væri tilefni til þess að Alþingi skipaði rannsóknarnefnd til þess að fara ofan í kjölinn á fjárfestingarleiðinni svokölluðu, sem hér var við lýði á gjaldeyrishaftaárunum.
Gjaldeyrisútboð SÍ og möguleg tengsl þeirra við peningaþvætti komu til umræðu í þættinum Silfrið á RÚV síðastliðinn sunnudag. Það vakti athygli þegar ritstjóri Kjarnans, Þórður Snær Júlíusson, lét þau ummæli falla í þættinum að fjárfestingarleið Seðlabanka Íslands hefði verið ein skýrasta opinbera peningaþvættisleið sem nokkurn tímann hafi verið framkvæmd.
Mbl.is fjallar um málið í gær og segir forsætisráðherra, Katrínu Jakobsdóttir, hafa í svari við fyrirspurn Þórhildar bent á að Seðlabankinn hefði sjálfur gefið út skýrslu um málið sem ekki hefði verið tekin fyrir á Alþingi, en slíkt ætti að sjálfsögðu að gera, t.d. hjá efnahags- og viðskiptanefnd eða stjórnskipunar- og eftirlitsnefnd. Ekki væri rétt að fjármunir hafi streymt hingað til lands eftirlitslaust, enda hafi Fjármálaeftirlitið sinnt eftirlitshlutverki vegna fjárfestingarleiðarinnar.
Spurði Þórhildur Sunna þá hvort ekki væri tilefni til þess að Alþingi léti rannsaka þá stofnun sem rannsakaði sjálfa sig.
Í svari sínu sagði Katrín það eðlilegt að viðeigandi nefndir Alþingis byrjuðu á að taka skýrslu Seðlabankans fyrir og athuga hvort þar væri spurningum ósvarað.
Ummæli Þórðar í Silfrinu voru borin undir Bjarna Benediktsson fjármálaráðherra í gær og sagði hann í samtali við mbl.is að ósmekklegt væri að segja að þetta hafi verið opinber peningaþvættisleið, eins og sérstaklega hafi verið hvatt til þess. „En ég tek öllum ábendingum af alvöru ef að ekki hefur verið nægilega gætt að aðhaldi eða eftirliti meðal annars um uppruna fjár,“ sagði Bjarni Ben.