Landsbankinn lauk í dag sölu á nýjum 5,5 ára skuldabréfaflokki að fjárhæð 300 milljónir evra með lokagjalddaga í maí 2023 og bera skuldabréfin fasta 1,00% vexti, sem framkvæmdastjóri Fjármála hjá bankanum segir vera betri kjör og til lengri tíma en áður hafi verið í lánasafni bankans. Lánin verða meðal annars nýtti til endurfjármögnunar eldri lána.
Skuldabréfin voru seld á kjörum sem jafngilda 85 punkta álagi á miðgildi vaxtatilboða í vaxtaskiptasamningum á markaði segir í fréttatilkynningu frá bankanum. Heildareftirspurn nam yfir 600 milljónum evra frá 70 fjárfestum, og voru skuldabréfin seld til stofnanafjárfesta í Bretlandi, meginlandi Evrópu, Norðurlöndum og Asíu.
Andvirði skuldabréfaútgáfunnar verður meðal annars nýtt til endurfjármögnunar evru-útgáfu bankans á gjalddaga í október 2018 í framhaldi af endurkaupatilboði bankans sem lýkur á föstudag, 24. nóvember 2017. Skuldabréfin verða gefin út undir EMTN-útgáfuramma bankans og er stefnt að því að skuldabréfin verði tekin til viðskipta í írsku kauphöllinni þann 29. nóvember 2017.
Hreiðar Bjarnason, framkvæmdastjóri Fjármála hjá Landsbankanum segir bankann vera að fjármagna sig í erlendri mynt á betri kjörum og til lengri tíma en áður. „Mikil eftirspurn breiðs hóps fjárfesta í útgáfunni er til vitnis um mikið traust fjárfesta til Landsbankans og íslensks efnahagslífs,“ segir Hreiðar.
„Útgáfan kemur í kjölfar nýlegrar hækkunar S&P Global Ratings á lánshæfiseinkunn bankans.“ Umsjónaraðilar sölunnar voru Citigroup, Deutsche Bank, Morgan Stanley og Nomura.
