Hagnaður Góðra samskipta ehf., félags almannatengilsins Andrésar Jónssonar, dróst saman um tæpar 70 þúsund krónur milli ára á síðasta ári, úr rétt rúmlega 6 milljónum króna í vel rúmlega 5,9 milljónir króna.
Rekstrarkostnaðurinn jókst um annað eins og nam 36,3 milljónum í heildina meðan rekstrartekjurnar drógust saman um tæplega 650 þúsund krónur, úr 45,2 milljónum í tæplega 44,6 milljónir króna.
Rekstrarhagnaðurinn (EBIT) dróst því saman um 7% milli ára, úr tæplega 8,3 milljónum króna í 7,7 milljónir króna. Heildarfjármagnsliðir voru neikvæðir um 250 þúsund sem er þrír fjórðu hlutum minna en árið áður þegar þeir voru neikvæðir um ríflega 730 þúsund krónur.
Hagnaðurinn fyrir skatta dróst einungis saman um 1,2%, úr 7,5 milljónum í 7,4 milljónir, og nam tekjuskatturinn svipaðri upphæð bæði árinn eða 1,5 milljónum króna.
Eiginfjárhlutfallið helmingaðist og starfsgildum fækkaði
Eignir félagsins drógust saman um tæplega fimmtung, úr 19,7 milljónum króna í 16,1 milljón króna meðan skuldirnar jukust um tæplega 5%, úr 13,3 milljónum í 13,7 milljónir króna. Heildareignirnar drógust því saman um tæplega fimmtung, úr 19,7 milljónum í 16,1 milljón króna, meðan eiginfjárhlutfallið ríflega helmingaðist milli ára, úr 33% í 15%.
Mikill viðsnúningur var í sjóðsstreymi félagsins milli ára, en handbært fé frá rekstri var neikvætt um 1,9 milljónir árið 2017 en var jákvætt um 600 þúsund krónur á síðasta ári. Veltufé frá vexti lækkaði hins vegar um 700 þúsund eða 8% milli ára, úr tæplega 9 milljónum í 8,3 milljónir króna.
Andrés Jónsson er eins og áður segir framkvæmdastjóri sem og stjórnarmaður félagsins. Á árinu fækkaði meðalfjöldi starfa úr 3 í 2,2 meðan launakostnaðurinn jókst um 12%, úr 21,7 milljónum króna í 24,3 milljónir króna.
