Gréta María Grétarsdóttir, fyrrverandi framkvæmdastjóri Krónunnar, hefur ráðið sig til sjávarútvegsfyrirtækisins Brims. Þar mun hún gegna stöðu framkvæmdastjóra nýsköpunar, samfélagsábyrgðar og fjárfestatengsla. Þetta kemur fram í tilkynningu til Kauphallarinnar.
„Það er ánægjulegt að fá Grétu Maríu til liðs við okkur. Reynsla hennar og áherslur munu hjálpa okkur að efla starfsemi okkar og festa Brim í sessi sem leiðandi sjávarútvegsfyrirtæki,“ er haft eftir Guðmundi Kristjánssyni forstjóra Brims í tilkynningunni.
„Ég er mjög ánægð að vera komin til Brims og hlakka til að taka þátt í áframhaldandi uppbyggingu á einu af öflugasta sjávarútvegsfyrirtæki landsins. Brim hefur verið leiðandi í umhverfismálum og við munum halda áfram að starfa í sátt við umhverfið og samfélagið. Við munum einnig leggja okkar af mörkum við að styðja við verðmætasköpun í bláa hagkerfinum með öflugri rannsóknar og þróunarvinnu,“ segir Gréta María.
Gréta María er með víðtæka reynslu úr atvinnulífinu. Hún var framkvæmdastjóri Krónunnar þar til í vor og áður fjármálastjóri Festi. Gréta hlaut Viðskiptaverðlaun Viðskiptablaðsins og Frjálsrar verslunar árið 2019 fyrir áherslu á umhverfis- og lýðheilsumál í störfum sínum hjá Krónunni. Hún býr einnig að reynslu úr bankakerfinu og upplýsingatæknigeiranum. Hún hefur setið í fjölmörgum stjórnum og einnig sinnt kennslu við verkfræðideild Háskóla Íslands og við MPM nám í verkefnastjórn. Gréta lauk meistaragráðu í verkfræði frá Háskóla Íslands 2008.