Íbúðirnar átta sem fasteignafélagið 235 Fasteignir setti á sölu á Ásbrú síðastliðinn sunnudag seldust upp á þremur dögum. Um 200 manns mættu til að skoða íbúðirnar á opnu húsi. Kaupendur íbúðanna voru aðallega fjölskyldufólk af Suðurnesjum að því er kemur fram í fréttatilkynningu.
„Það voru aðallega fjölskyldur af Suðurnesjum sem keyptu íbúðirnar en við finnum einnig fyrir miklum áhuga frá fjölskyldufólki af höfuðborgarsvæðinu,” segir Ingi Júlíusson, framkvæmdastjóri 235 Fasteigna. „Markmið okkar er að byggja hér upp fjölskylduvænt hverfi og okkur til mikillar gleði virðist það ætla að takast,” bætir hann við.
Mikil eftirspurn
Íbúðirnar átta eru fyrstu íbúðirnar sem 235 Fasteignir setur á sölu á gamla varnarliðssvæðinu. Íbúðirnar eru 89 – 95 fermetrar að stærð og var ásett verð þeirra frá 22 milljónum króna. Íbúðaverðið er töluvert lægra en gengur og gerist á Suðurnesjum sem og höfuðborgarsvæðinu. Gríðarleg uppbygging hefur verið á Ásbrú frá því að varnarliðið yfirgaf svæðið en nú búa þar um 2.700 manns.
Mikil eftirspurn er eftir húsnæði á Suðurnesjum. Mannfjöldaspár gera ráð fyrir að íbúum á svæðinu eigi eftir að fjölga um 55% á næstu árum og að þeir verði tæplega 35 þúsund talsins árið 2030. Atvinnuppbygging á Suðurnesjum hefur verið í miklum blóma síðustu ár og þar starfa mörg af stærstu fyrirtækjum landsins. 235 Fasteignir áætla að setja um þrjátíu íbúðir, frá 90 – 132 fermetrum, í fjölbýlishúsahverfinu við Skógarbraut á Ásbrú í sölu um miðjan mánuðinn.
