Íslandsbanki hefur í dag gefið út skuldabréf að fjárhæð 750 milljónir sænskra króna sem samsvarar 9,3 milljörðum íslenskra króna en þetta er í fyrsta skipti frá árinu 2008 sem fjármálastofnun gefur út víkjandi bréf á erlendum mörkuðum að því er kemur fram í tilkynningu frá Íslandsbanka.
Bréfin voru seld til fagfjárfesta frá Norðurlöndunum og meginlandi Evrópu. Stefnt er að skráningu skuldabréfanna í Kauphöllina á Írlandi þann 23. nóvember 2017. Umsjónaraðilar útboðsins voru Danske Bank, DNB Markets og Pareto Securities.Í tilkynningu bankans segir að með útgáfunni sé stigið stórt skref í átt að hagstæðari fjármagnsskipan á skuldahlið bankans.
"Við hjá Íslandsbanka erum afar ánægð með útgáfuna og þann mikla áhuga sem við fundum hjá fjárfestum. Margir þessara fjárfesta hafa notið góðs af því að hafa keypt hefðbundin skuldabréf af bankanum á liðnum árum og þátttaka þeirra í útgáfunni sýnir áframhaldandi trú á honum sem útgefanda og á íslenska hagkerfin," er haft eftir Jóni Guðna Ómarssyni, fjármálastjóra Íslandsbanka, í tilkynningu frá bankanum.
Bréfin eru til 10 ára með innköllunarheimild af hálfu útgefanda eftir 5 ár. Skuldabréfið, sem er víkjandi og telur til eiginfjárþáttar 2, ber fljótandi vexti 200 punkta ofan á þriggja mánaða millibankavexti í sænskum krónum. Útgáfan fær lánshæfismatseinkunnina BBB- frá S&P Global Ratings sem er einkunn í fjárfestingaflokki.
