Gengi íslensku krónunnar styrktist í dag um 1,93% gagnvart evru og þetta mesta hreyfing á gengi hennar frá því í byrjun apríl. Gengi krónunnar gagnvart evru hefur haldist nær stöðugt undanfarið og var nær það sama frá 13. júní fram til 17. júlí þegar það stóð í 141,7 krónum fyrir eina evru.
Síðustu viku hefur krónan hins vegar tekið að styrkjast og hefur eftir styrkingu dagsins styrkst um rúmlega 3% á síðustu viku. Gengi krónu gagnvart evru stóð í lok dags 137,2 krónum. Þá styrktist krónan um 1,34% gagnvart dollar en minni styrking gagnvart dollar kemur til af því að gengi evru veiktist um tæplega hálft prósent gagnvart dollar í viðskiptum dagsins en millibankamarkaður með gjaldeyri á Íslandi er í evrum.
Samkvæmt þeim aðilum á markaði sem Viðskiptablaðið ræddi við skýrist styrking dagsins að einhverju leyti af sölu innlendra aðila á gjaldeyri.
