Flestir nefna Ólaf Ragnar Grímsson sem óskaforseta sinn í könnun Frjálsrar verslunar . Litlu munar þó á honum og Guðna Th. Jóhannessyni. Í könnuninni var þátttakendum gefinn kostur á að nefna hvaða Íslending sem er og nefndu 32% Ólaf Ragnar en 27% Guðna.
Könnunin var gerð dagana 26. apríl til 1. maí og tók til 445 manns. Af þeim tóku 74% afstöðu til spurningarinnar. Meðal annars var spurt hvern þátttakendur vildu sem forseta ef þeir mættu nefna hvaða Íslending sem er. Munurinn á Ólafi Ragnari og Guðna í könnuninni er sagður marktækur.
Á eftir tvímenningunum kom Katrín Jakobsdóttir, sem hefur lýst því yfir að hún ætli ekki í forsetaframboð, með 8% tilnefninga og Andri Snær Magnason, rithöfundur og forsetaframbjóðandi, með 6%.