Dótturfélagi Haga, Bönunum ehf., verður óheimilt að bjóða Lemon betri viðskiptakjör en samkeppnisaðilum í kjölfar kaupa Haga á 49% hlut í Djús ehf., sem rekur skyndibitastaði undir merkjum Lemon. Þetta kemur fram í ákvörðun Samkeppniseftirlitsins .
Sjá einnig: Hagar kaupa í Lemon
Í ákvörðuninni segir að Lemon sé skuldbundið til að kaupa grænmeti og ávexti af samkeppnisaðilum Banana bjóði þeir slíkar vörur á sambærilegum eða betri kjörum en Bananar. Þá má Lemon ekki heldur semja um kaup á ákveðnu magni af Bönunum.
Ástæðan er sátt Haga og Banana við SKE frá árinu 2002, sem er enn í gildi, um að Bönunum sé óheimilt að bjóða félögum innan Haga betri kjör umfram samkeppnisaðila til þess að efla samkeppni. Lemon hefur að mestu keypt ávexti og grænmeti af Mata hf. en undanfarið hefur félagið einnig keypt þessar vörur af Bönunum.
Samkeppniseftirlitið gerir ekki aðrar athugasemdir við samrunann þar sem að félögin starfa að mestu á ótengdum mörkuðum. Aðrir eigendur Lemon eftir kaupin eru Spicy ehf., félag í eigu Jóhönnu Soffíu Birgisdóttur og Sveinbergs Gíslasonar, Foss fjármál ehf. og Málaraverktakar ehf.