Nú þegar árinu 2021 er senn að ljúka er tilvalið að líta yfir þær erlendu fréttir sem vöktu mesta athygli lesenda Viðskiptablaðsins á liðnu ári. Hér eru þær fréttir sem voru í sætum 6 til 10 yfir mest lesnu erlendu fréttir ársins.
6. Yfir 900 sagt upp fyrir Novator samruna
Vishal Garg, forstjóri húsnæðislánafyrirtækisins Better sem mun sameinast sérhæfðu yfirtökufélagi Björgólfs Thors, sagði upp meira en 900 manns, eða um 9% af starfsfólki sínu, á Zoom fundi í byrjun desembermánaðar. Uppátæki Garg var harðlega gagnrýnt og baðst hann afsökunar í kjölfarið.
7. Björgólfur Thor í blómabransann
Í byrjun árs var sagt frá því að Novator, fjárfestingafélag Björgólfs Thors, væri meðal fjárfesta í Bloom & Wild, vefverslun sem býður upp á heimsendingu á blómum og öðrum gjafavörum. Verslunin tryggði sér 102 milljóna dala fjármögnun sem mun nýtast í frekari sókn inn á evrópskan markað.
8. Rafbíll með 1.000 km drægni
Í byrjun árs kynnti kínverski bílaframleiðandinn NIO til leiks nýja lúxusrafbílinn NIO ET7, en bíllinn er væntanlegur á markað á fyrri hluta næsta árs. Bílaframleiðandinn er í harðri samkeppni við Tesla í Kína, en félagið var á barmi gjaldþrots áður en kínversk stjórnvöld komu félaginu til bjargar.
9. Bað starfsfólk að hætta að væla
Bill Michael, fyrrverandi stjórnarformaður KPMG á Bretlandi, sagði starfi sínu lausu í febrúarmánuði eftir að hafa beðið starfsfólk um að „hætta að væla" yfir COVID-19 og áhrifum samkomutakmarkana á líf starfsmanna. Michael fékk sjálfur COVID-19 í mars á síðasta ári og var lagður inn á spítala vegna þess.
10. Flugrisarnir óttast 5G-væðingu
Í lok árs lýstu stóru bandarísku flugfélögin American Airlines, Southwest Airlines og United Airlines yfir áhyggjum af því að fyrirhuguð innleiðing á 5G myndi leiða til tafa og truflana á flugum. Hagsmunasamtök bandarískra fjarskiptafyrirtækja (CITA) lýstu umræðunni sem hræðsluáróðri.