Úrvalsvísitala kauphallar Nasdaq Iceland lækkaði um 4,06% í dag og endaði í 1872,39 stigum. Þá hefur vísitalan lækkað um 0,43% frá áramótum. Vísitalan hefur ekki lækkað svo mikið á einum viðskiptadegi í tæp sex ár, en hún lækkaði um 4,99% þann 19. maí árið 2010. Ekkert skráð félag hækkaði í verði í dag.

Mest lækkaði gengi bréfa Icelandair Group, eða um heil 7,46% í 3,7 milljarða króna viðskiptum. Verð á hvern hlut Icelandair er 36 krónur. Þá lækkaði gengi bréfa Marel um 2,29% í viðskiptum upp á 1,1 milljarð króna. Hver hlutur félagsins kostar 48,7 krónur.

Heildarvelta á hlutabréfamarkaði í dag var tæplega 7,3 milljarðar króna. Heildarvelta á skuldabréfamarkaði var 6,5 milljarðar króna.

Hlutabréfavísitala GAMMA lækkaði um 3,4% í dag í 7,3 milljarða króna viðskiptum. Skuldabréfavísitala GAMMA lækkaði um 0,3% í dag í 6 milljarða króna viðskiptum. Verðtryggði hluti vísitölunnar lækkaði um 0,3% í 0,2 milljarða króna viðskiptum og óverðtryggði hluti vísitölunnar lækkaði um 0,2% í 5,7 milljarða króna viðskiptum.