Þátttaka í símenntun hefur farið minnkandi undanfarin tvö ár eftir aukningu á milli áranna 2014 og 2015 að því er kemur fram í nýjum gögnum Hagstofunnar. Tæplega 23% landsmanna á aldrinum 25-64 ára sóttu sér fræðslu, annað hvort í skóla eða aðra fræðslu með leiðbeinanda árið 2017, alls 39.600 manns.

Þótt fækkun milli ára sé eingöngu 1,4 prósentustig, hefur hlutfall þeirra sem sóttu símenntun ekki verið lægra síðan tölur um símenntun voru fyrst birtar árið 2003, þegar það var 22,2%. Mest var fækkunin meðal háskólamenntaðra karla, um 4 prósentustig í hvorum aldurshópi.

Þó var þátttaka í símenntun almennt mest meðal háskólamenntaðra en rúm 30% háskólamenntaðra landsmanna á aldrinum 25-64 ára sóttu sér fræðslu árið 2017. Hlutfallið var lægra meðal þeirra sem lokið höfðu starfs- og framhaldsmenntun, um 21%, og lægst meðal þeirra sem eingöngu höfðu lokið grunnmenntun, rúm 12%.

Þátttaka í símenntun var mest í aldurshópnum 16-24 ára, 61,2%, sem skýrist af því að stór hluti aldurshópsins sækir framhaldsskóla- og háskólanám. Minnst þátttaka var hins vegar í aldurshópnum 55-74 ára, 11,4%. Konur voru um 54% allra sem sóttu sér fræðslu á aldrinum 16-74 ára, 35.900 talsins, en karlar voru 30.400.

Mikill meirihluti þeirra sem tóku þátt í símenntun voru starfandi á vinnumarkaði, 34.900 manns. Í þessum hópi var þátttaka í símenntun utan skóla mun meiri en innan, tæp 18% sóttu símenntun utan skóla á móti rúmlega 7% sem sóttu sér símenntun innan skóla. Þessu er öfugt farið hjá þeim sem voru atvinnulausir og þeim sem voru utan vinnumarkaðar, þar sem fleiri kusu að sækja sér fræðslu innan skóla en utan. Um 18% atvinnulausra og þeirra sem voru utan vinnumarkaðar tóku þátt í símenntun innan skóla en þátttaka þessara hópa í símenntun utan skóla var á bilinu 7-10%.