Streymisveitan Netflix leitar leiða til þess að herja í auknum mæli á Afríkumarkað og hefur afrískt sjónvarpsefni verið að bætast inn á streymisveituna undanfarið. Helstu aðgangshindranir sem streymisveitan þarf að vinna bug á eru hægar og dýrar nettengingar, auk þess sem skortur er á traustum og öruggum greiðslumiðlunarkerfum í álfunni. Reuters greinir frá.
Streymisveitan vinsæla er með 193 milljónir áskrifenda um heim allan og vonast til að bæta vel í áskrifendahópinn með því að sækja inn á afrískamarkaðinn.
Netflix hefur þegar gengið frá samstarfssamningum við Vodacom og Telekom í Suður-Afríku og vinnur í að gera fleiri samninga til að geta aukið umsvif sín í álfunni.
