Sælgætisgerðin Nói Síríus hyggst stefna ríkinu vegna „ blygðunarlausrar mismununar“. Félagið telur fullreynt að ná samningum við stjórnvöld um að rétta af samkeppnisstöðu innlendra framleiðenda við erlendar sælgætisgerðir. Frá þessu er greint á vef Morgunblaðsins.
Þetta segir Finnur Geirsson, forstjóri fyrirtækisins. Vísar hann til þeirrar staðreyndar að háir tollar á innflutt mjólkurduft valdi því að fyrirtækið verði að kaupa íslenskt mjólkurduft sem kosti í flestum tilvikum að minnsta kosti tvöfalt meira en mjólkurduft að utan.
Tollarnir valda því að hráefniskostnaður fyrirtækisins hækki um allt að 60 milljónir króna á hverju ári. Veikir það samkeppnisstöðu fyrirtækisins gagnvart erlendum keppinautum sem flytji vörur sínar fullunnar, með mjólkurdufti í, til landsins án þess að á þær leggist tollar á borð við mjólkurduftið óblandað.
Finnur segir félagið hafa reynt að semja við ríkið en án árangurs. Samtök iðnaðarins hafa einnig reynt að aðstoða félagið en það hefur gengið erfiðlega. Því telur Finnur félagið þurfa að taka málið í eigin hendur.
Nói Síríus fagnar 100 ára afmæli nú í júnímánuði.
