Í gærkvöldi opnaði Icelandair nýja setustofu, Saga Lounge, í nýrri byggingu á efstu hæð flugstöðvar Leifs Eiríkssonar. Um er að ræða 1.400 fermetra setustofu, sem er um tvöfalt stærri en sú eldri, sem var í kjallara flugstöðvarinnar. Sætum og veitingastöðum er fjölgað og þægindi aukin, að því er segir í tilkynningu.
Icelandair Saga Lounge er einn af fjölsóttari samkomustöðum landsins en gert er ráð fyrir að gestir félagsins þar verði um 120 þúsund á árinu. Setustofan var hönnuð af Eggert Ketilssyni og Stíg Steinþórssyni, sem höfðu að leiðarljósi stefnu Icelandair um að bjóða viðskiptavinum íslenska upplifun með lita,- og efnisvali og sérstökum munum eins og afsteypu af þekktum álfasteini.
