Útibú Arion banka í Kringlunni opnaði á nýjan leik, fimmtudaginn 21. september, eftir gagngerar breytingar. Þetta kemur fram í fréttatilkynningu.
„Endurnýjað útibú Arion banka er það fyrsta sinnar tegundar hér á landi og verður útlit útibúsins og þjónusta með nýju sniði. Markmiðið með breytingunum er að bjóða viðskiptavinum enn þægilegri bankaþjónustu. Stór þáttur í því er nýr afgreiðslutími en útibúið verður opið alla daga vikunnar á sama tíma og verslanir í Kringlunni. Ekkert bankaútibú á landinu er með jafnrúman afgreiðslutíma. Í dag verður útibúið opið til klukkan 9 á fimmtudögum,“ segir i tilkynningu frá bankanum.
Ýmsar aðrar nýjungar eru í útibúinu. Starfsfólk útibúsins verður til dæmis hvorki í gjaldkerastúkum né við skrifborð heldur á gólfinu, viðskiptavinum til aðstoðar, meðal annars við notkun á stafrænum þjónustuleiðum. Sérfræðingar í þjónustuveri Arion banka eru jafnframt aðgengilegir í gegnum fjarfundarbúnað. Í útibúinu verður viðburðasalur þar sem efnt verður til fræðslufunda og annarra viðburða.
Auk hefðbundinna hraðbanka er gjafakortahraðbanki í útibúinu. Þá verður gjaldeyrishraðbankinn, sem settur var upp síðastliðið vor, á sínum stað en hann afgreiðir evrur, Bandaríkjadollara, danskar krónur og bresk pund.
