Framkvæmdastjóri Samtaka atvinnulífsins, Halldór Benjamín Þorbergsson, segir í samtali við Fréttablaðið í dag að SA séu reiðubúin að fallast á kröfu um afturvirkni samninga verði samið á skynsamlegum nótum fyrir mánaðamót.

„Til að liðka fyrir viðræðum og lausn geta SA fallist á gildistöku í formi afturvirkni frá 1. janúar 2019 ef fyrir janúarlok verða undirritaðir kjarasamningar sem taka mið af svigrúmi atvinnulífsins til launabreytinga. Það tilboð fellur auðvitað niður ef viðræðum er slitið og boðað til verkfalla, enda ber allt samfélagið kostnað af þeirri aðgerð.“

Halldór segir að krafan um afturvirkni sé ekki ný af nálinni og geti verið skynsamleg ef skynsamlegir samningar nást.

„Um stór efnisatriði eins og launahækkanir, samningstíma og afturvirkni er tekin ákvörðun í lok samningaviðræðna.“