Samkvæmt heimildum Viðskiptablaðsins greip Seðlabankinn inn í gjaldeyrismarkaðinn í dag til að vinna gegn styrkingu krónunnar.
Krónan styrktist gagnvart öllum helstu myntum á markaði í dag og hefur ekki verið sterkari gagnvart evru síðan um miðjan mars. Aðilar á markaði sem Viðskiptablaðið ræddi við segja að mikil sala hafi verið á gjaldeyrismarkaði í dag sem hafi ýtt undir styrkingu krónunnar.
Krónan styrktist um 1,52% gagnvart evru en ein evra kostar nú um 148 krónur en evran fór hæst í tæplega 160 krónur í byrjun maí. Síðan þá hefur krónan styrkst um 7% gagnvart evru. Nú stendur dollarinn í 132 krónum en krónan hefur styrkst um 1,98% gagnvart dollar það sem af er degi. Þá hefur hún styrkst um 1,64% gagnvart pundinu. Viðskiptablaðið fjallaði um í síðustu viku að Seðlabankinn hafi einnig gripið inn í gjaldeyrismarkaðinn.
Seðlabankinn hefur gefið út að inngrip hans á gjaldeyrismarkaði miði að draga úr sveiflum á gengi krónunnar.
