Næsta skref í þroskasögu Marel

„Við erum að vinna að tvíhliðaskráningu bréfanna, þar sem hlutabréf Marel yrðu skráð í erlenda kauphöll til viðbótar við þá íslensku,“ segir Árni Oddur Þórðarson, forstjóri Marel í viðtali í tímaritinu Áramót, sem gefið er út af Viðskiptablaðinu og Frjálsri verslun. Árni Oddur og Marel hlutu fyrri í dag Viðskiptaverðlaunin.

„Þó að félagið hafi yfir 99% tekna utan Íslands og geri upp í evrum, þá eru hlutabréfin skráð í íslenskum krónum hér á landi. Við teljum að fyrir alþjóðafyrirtækið Marel sé mjög mikilvægt að fá alþjóðlegt leiksvið fyrir hlutabréf félagsins. Verðmyndun og flæði bréfa frá degi til dags verði mun virkara í alþjóðlegri kauphöll. Það er mikill áhugi á félaginu en geta ýmissa fjárfesta til að fjárfesta á Íslandi er oft skilmálum háð.

Það var mikið heillaskref fyrir Marel að skrá sig hér á landi árið 1992. Við höfum í dag breiðan hóp hluthafa sem hafa stutt vel við vaxtarsögu Marel. Skráning í alþjóðlega kauphöll er eðlilegt næsta skref í framþróun félagsins. Það er hvorki hollt fyrir íslenskan hlutabréfamarkað að eitt fyrirtæki vegi svo þungt né fyrir okkur að vera svo háð sveiflum á þessum örmarkaði.

Yfirtökur á fjölskyldufyrirtækjum eru stór hluti af vaxtarsögu Marel. Við sameinum krafta okkar til að gera enn stærri hluti saman og umbreyta markaðnum. Í flestum tilvikum vilja eigendur þeirra félaga sem við sameinumst eiga áfram eignarhlut í stærri heild og sögu. Við tvíhlíða skráningu verða bréf félagsins aðgengileg í erlendri mynt í alþjóðlegri kauphöll sem styður þá frekar við vöxt og framþróun félagsins.

Við erum að skoða Kaupmannahöfn, Amsterdam eða London. Allar þessar kauphallir eru alþjóðlegar og má nefna sem dæmi að í þeirri minnstu sem er Kaupmannahöfn að þá eru um 60% viðskipta frá alþjóðlegum fjárfestum utan Danmerkur. Til samanburðar eru að mestu íslenskir fjárfestar á okkar smáa markaði. Við höfum sterkar rekstrarrætur í öllum þessum löndum sem er mikilvægt. Eitt er að skrá sig í erlendri kauphöll en það er bara toppurinn á ísjakanum því það sem skiptir mestu er hvernig mun ganga eftir skráninguna. Sagan sýnir að félög sem velja að skrá sig í landi þar sem þau eru hluti af samfélaginu, gengur betur en þeim sem hafa engar rætur í viðkomandi landi. Við erum að skoða allar þessar þrjár kauphallir jöfnum höndum.

Til þess að einfalda ferlið þá skoðuðum við hvort við ættum að afskrá félagið á Íslandi og skrá það erlendis. Erlendu fjárfestarnir í Marel, íslensku lífeyrissjóðirnir og erlendu bankarnir ráðlögðu okkur frá því. Þegar félag sé með virkan hluthafahóp, sem hefur fylgt félaginu lengi og stutt vel við vaxtarsöguna eins og Marel hefur, þá væri ekki rétt að afskrá það. Félög sem færu þá leið væru oftast nær í meiriháttar vandræðum og í leit að fjármagni. Markmið okkar með skráningu erlendis er að ná betur til erlendra fjárfesta og fá fram dýpri verðmyndun með bréfin okkar. Við erum ekki að leita okkur að fjármagni við skráninguna, þess vegna hófum við að kaupa eigin bréf til að geta endurútgefið þau við skráningu erlendis. Skuldir Marel eru við neðri mörk þess sem við teljum vera ásættanlegt miðað við reksturinn. Marel skuldar tvisvar sinnum EBITDA. Þetta næsta skref í þroskasögu Marel er gífurlega spennandi og við erum full tilhlökkunar.“

Ítarleg viðtal við Árna Odd Þórðarson er að finna í Áramótum, tímariti Viðskiptablaðsins og Frjálsrar verslunar.