Starfsfólki Iceland Travel hefur verið boðið að draga úr vinnu eða fara í launalaust leyfi frá og með haustinu. Þetta kemur fram á vef Túrista . Þessi leið er farin til að mæta fækkun verkefna hjá ferðaskrifstofunni samkvæmt svari frá Icelandair Group, móðurfélagi Iceland Travel.

Í haust er svo ætlunin að hefja söluferli á fyrirtækinu en það hefur áður komið fram í máli forsvarsmanna Icelandair Group að rekstur ferðaskrifstofunnar hafi verið erfiður undanfarið og áfram séu blikur á lofti.

Iceland Travel hefur lengi verið einn stærsti skipuleggjandi á Íslandsferðum og fyrir nærri tveimur árum síðan stóð til að sameina fyrirtækið við ferðaþjónustufyrirtækið Gray Line. Sá samruni var gerður með fyrirvara um niðurstöðu áreiðanleikakönnunar og þegar hún lá fyrir var hætt við sameiningu.