Búist er við að metfjöldi Bandaríkjamanna hafi sótt um að komast á atvinnuleysisskrá í nýliðinni viku. Samkvæmt greiningu Goldman Sachs á bráðabirgðatölum í 30 ríkjum Bandaríkjanna er ráðgert að 2,25 milljónir Bandaríkjamanna hafi óskað eftir því að fara á atvinnuleysisskrá í síðustu viku. Fyrra metið hefur staðið í nærri 38 ár eða frá haustmánuðum 1982 þegar 695 þúsund sóttu um atvinnuleysisbætur á einni viku.

Í besta falli gerir Goldman ráð fyrir að ein milljón bætist á atvinnuleysisskrá. Bank of America er enn svartsýnni og býst við að allt að þrjár milljónir manna hafa óskað eftir atvinnuleysisbótum í síðustu viku og að ein milljón til viðbótar bætist við í apríl.

Tölurnar fyrir landið í heild vegna síðustu viku verða birtar á fimmtudaginn næstkomandi. Stjórn Donald Trump hefur beðið vinnumálastofanir einstaka ríkja að bíða með að birta fjölda umsókna um atvinnuleysisbætur þar til landstölurnar eru birtar á fimmtudaginn en halda sig frekar við orðalag á borð við „mjög mikla fjölgun“ eða „mikinn vöxt“.

Síðastliðinn fimmtudag kom í ljós að umsóknum um atvinnuleysisbætur vikuna þar á undan hefðu verið 281 þúsund sem er fjölgun um 33% milli vikna. Það er mesti vöxtur milli vikna frá árinu 1992. Ohio ríki birti á föstudaginn tölur sem ná til síðasta fimmtudags. Þar fjölgaði beiðnum um atvinnuleysisbætur úr 4.815 í 139.468 milli vikna.

Þó stefni í metfjölgun milli vikna er atvinnuleysi enn ekki komið á þann stað sem það var fyrir rúmum áratug. Árið 2009 fór atvinnuleysi í Bandaríkjunum í 10% þar sem yfir 15 milljónir Bandaríkjamanna voru atvinnulausar. Til samanburðar var atvinnuleysi í Bandaríkjunum 3,5% í febrúar þar sem um sex milljónir Bandaríkjamanna voru skráð atvinnulaus.