Í dag gaf bandaríska flugfélagið American Airlines út uppgjör fyrir annan ársfjórðung þessa árs. Frá þessu er greint á vef mbl.is .
Meðal þess sem fram kemur í uppgjörinu er að tekjufall fyrirtækisins á tímabilinu sé um 86% samanborið við sama tímabil í fyrra.
Í tilkynningu frá flugfélaginu kemur fram að tap ársfjórðungsins sé rétt ríflega tveir milljarðar Bandaríkjadala. Til samanburðar var hagnaður af starfsemi fyrirtækisins á öðrum ársfjórðungi í fyrra og nam hann rétt um 662 milljónum Bandaríkjadala. Breytinguna er hægt að rekja til heimsfaraldurs kórónuveiru.
Forstjóri American Airlines, Doug Parker, segir að faraldurinn hafi haft víðtæk áhrif á reksturinn. Þannig hafi eftirspurn hrunið á einu augabragði. „Þetta hefur verið einn erfiðasti ársfjórðungur í sögu fyrirtækisins.“