Aflstöðin að Þeistareykjum var gangsett í dag en um er að ræða 17. Aflstöð Landsvirkjunar og þriðju jarðvarmastöðina. Þeistareykjastöð verður 90 MW. Hún er reist í tveimur 45 MW áföngum og var vélasamstæða 1 gangsett í dag og tengd við flutningskerfi Landsnets að því er kemur fram í tilkynningu frá Landsvirkjun. Heildarkostnaður við virkjunina er áætlaður 300 milljónir Bandaríkjadala, en þessi áfangi hennar inni í þeirri tölu.

Fyrir eru Kröflustöð og gamla gufustöðin í Bjarnarflagi. Þeistareykjastöð er fyrsta jarðvarmastöð sem Landsvirkjun byggir frá grunni. Fjármála- og efnahagsráðherra, Benedikt Jóhannesson, og ferðamála-, iðnaðar- og nýsköpunarráðherra, Þórdís Kolbrún R. Gylfadóttir, gangsettu virkjunina í sameiningu.

Í ávarpi sínu sagði Þórdís Kolbrún iðnaðarráðherra að um þjóðhagslega hagkvæman virkjunarkost væri að ræða, sem myndi auka hlutfall endurnýjanlegra orkugjafa og hafa jákvæð áhrif í víðtækum skilningi. Benedikt fjármálaráðherra sagði að gangsetning Þeistareykjastöðvar væri mikið gleðiefni; sem fjármálaráðherra hlyti hann að gleðjast yfir því í hvert skipti sem Landsvirkjun yki verðmæti sitt með nýjum verkefnum.

Mikil áhersla er lögð á varfærna uppbyggingu og nýtingu jarðvarmans á svæðinu segir í tilkynningunni, en fyrir liggur mat á umhverfisáhrifum fyrir allt að 200 MW virkjun á svæðinu. Uppsetning á vélasamstæðu 2 er nú í fullum gangi og er stefnt að því að orkuvinnsla hennar hefjist í apríl 2018.

Heimamenn áttu frumkvæði að nýtingu svæðisins, en saga Þeistareykjaverkefnisins nær allt til ársins 1999, þegar Þeistareykir ehf. voru stofnaðir í aprílmánuði. Stofnaðilar voru orkufyrirtækin Orkuveita Húsavíkur og Norðurorka, ásamt Aðaldælahreppi og Reykdælahreppi, sem er nú Þingeyjarsveit. Það var ekki fyrr en haustið 2005 að Landsvirkjun eignaðist um 32% í fyrirtækinu, en í kjölfarið jók fyrirtækið eignarhlut sinn smám saman og eignaðist félagið loks að fullu vorið 2010.

Árið 2011 hófst hönnun mannvirkja og þremur árum síðar, 2014, var  ráðist í umfangsmiklar undirbúningsframkvæmdir sem miðuðu að því að hægt væri að ráðast í uppbyggingu virkjunarinnar með stuttum fyrirvara.

Í febrúar 2015 var skrifað undir samning um kaup á einni 45 MW vélasamstæðu og tilheyrandi búnaði. Í ágústmánuði það sama ár var ákveðið að ráðast í annan áfanga verkefnisins, en hann snýr að kaupum og uppsetningu á annarri 45 MW vél.

Upphaf byggingaframkvæmda var á vormánuðum 2015, en hámarki náðu þær á verkstað  árið 2016 og þegar mest var störfuðu þar um 240 manns.

Forseti Íslands, herra Guðni Th. Jóhannesson, lagði hornstein að stöðvarhúsinu við hátíðlega athöfn í september 2016,. Frá þeim tíma hefur verið lokið við uppbyggingu stöðvarhúss, gufuveitumannvirki reist og lokið við boranir á þeim 8 vinnsluholum, til viðbótar þeim sem fyrir voru, sem knýja munu vélasamstæður virkjunarinnar.