Tóbaksrisinn Philip Morris, sem er hvað þekktastur fyrir að framleiða Marlboro sígaretturnar, hefur gert samning um að kaupa Vextura Group fyrir 1,24 milljarða dollara, um 153 milljarðar króna. Guardian greinir frá.
Vextura er breskt fyrirtæki sem framleiðir lyf við öndunarfærasjúkdómum líkt og astma og er einnig með öndunarfæralyf við COVID-19 í þróun. Kaupin eru sögð liður í nýrri stefnu Philip Morris en félagið stefnir að því að um milljarður af tekjum félagsins komi annars staðar frá en nikótíni árið 2025.
Fyrirtækið hefur undanfarið verið að leita að nýju tekjuflæði í kjölfar breyttra neysluhátta og minni reykinga. Til þessa hefur Philip Morris eytt tæplega 5,8 milljörðum dollara til þess að breikka vöruúrval sitt í átt að heilsusamlegri vörum og lyfjum.
Lausnir Vextura eru sögð munu verða uppistaðan í lausnum Philip Morris við öndunarfærasjúkdómum. Áður hafði félagið samþykkt að vera keypt af Carlyle, bandarískum vogunarsjóð, en því var hafnað í kjölfar hærra boðs frá Philip Morris.