Dómstóll í Namibíu hefur kyrrsett togarann Heinaste sem er í eigu Samherja og hefur stundað veiðar við strendur Afríku undanfarin ár. Fréttastofa RÚV greinir frá þessu og hefur namibíska dómsúrskurðinn undir höndum.
Samkvæmt úrskurðinum er skipið kyrrsett til þess að yfirvöld geti gert leit í skipinu.
Arngrímur Brynjólfsson, skipstjórinn á Heinaste, var handtekinn og leiddur fyrir dómara í Namibíu í gær vegna meintra ólöglegra veiða. Hann var látinn laus í gær gegn tryggingu og sendi frá sér yfirlýsingu til fjölmiðla vegna málsins. Þar sagðist hann vera undrandi á ásökunum vegna þess að sérstaklega sé gætt að því að veiða aldrei eitt á lokuðum svæðum.
„Þessi veiðiferð átti að vera sú síðasta á ferlinum og eru það mér mikil vonbrigði að verða fyrir þessum ásökunum nú,“ sagði Arngrímur í yfirlýsingunni en hefur stundað sjómennsku í hartnær hálfa öld og þar af skipstjóri í 34 ár.
Hvorki Björgólfur Jóhannsson, forstjóri Samherja, né skrifstofa Samherja hafa svarað fyrirspurnum fjölmiðla um málið í dag.