Barack Obama, fyrrverandi forseti Bandaríkjanna, virðist ekki vera eins smeikur við það og kollegi hans, Hillary Clinton, að halda ræður fyrir bankamenn og fjárfesta á Wall Street. Obama hefur haldið ræður í fjármálastofnunum á borð við Carlyle Group, Cantor Fitzgerald og Northern Trust. Þetta kemur fram í frétt Bloomberg um málið.

Þar er rifjað upp að Clinton, sem var frambjóðandi Demókrata í forsetakosningunum í fyrra og „átti“ að vera eftirmaður Obama, sagði nýverið að hún hafi séð eftir því að halda ræður fyrir bankamenn á Wall Street, líkt og Viðskiptablaðið hefur gert grein fyrir. Sama sektarkennd virðist ekki hafa náð til Obama — í það minnsta ekki eftir að hann lét af embætti í fyrra.

Samkvæmt heimildarmönnum Bloomberg fékk Obama um 400 þúsund Bandaríkjadali — eða um það bil 42 milljónir króna samkvæmt gengi dagsins í dag — greitt fyrir að halda ræðu fyrir viðskiptavini Northern Trust Corp nýverið. Að sögn upplýsingafulltrúa Obama hefur forsetinn fyrrverandi flutt ræður sem að „endurspegla gildi hans“. Einnig var tekið fram að Obama hafi gefið ágóðann í góðgerðastarf.