Framkvæmdastjórar þriggja íslenskra lífeyrissjóða hittu slitastjórn Kaupþing þar sem rætt var um kaup lífeyrissjóðanna á 87% hlut slitastjórnarinnar í Arion banka, en viðræður um verð eru ekki hafnar. Morgunblaðið greinir frá þessu í morgun.
Eins og greint var frá fyrir helgi þá ákváðu stjórnir þriggja stærstu lífeyrissjóða landsins Lífeyrissjóðs starfsmanna ríkisins (LSR), Lífeyrissjóðs verslunarmanna (LV) og Gildis, að þeir myndu hefja viðræður við slitastjórnina um möguleg kaup þeirra á Arion banka. Öðrum lífeyrissjóðum verður gerður kostur á að taka þátt í tilboðsgerðinni en hún verður þó undir forustu þessara þriggja stærstu lífeyrissjóða.
Viðskiptablaðið greindi frá því fyrr í mánuðnum að setið væri um Arion banka og að minnsta kosti þrír aðilar freisti þess að safna saman fjárfestum til að kaupa Arion banka af slitabúi Kaupþings.