Liz Truss, fyrrverandi forsætisráðherra Bretlands og Mark Carney, fyrrum seðlabankastjóri landsins, elduðu grátt silfur saman um helgina.
Sökuðu þau hvort annað um að hafa skaðað breskt efnahagslíf með stefnum sínum í efnahagsmálum.
Á fundi í Montreal í Kanada um helgina sagði Carney að í staðinn fyrir að gera Bretland að Singapúr við Thames-fljótið hafi ríkisstjórn Truss gert landið að Argentínu við Ermasundið.
Truss svaraði fyrir sig í viðtali við Financial Times og sagði Carney hafa staðið vörð um efnahagsstefnu, sem hafi á síðustu 25 árum leitt til lítils hagvaxtar í hinum vestræna heimi.
