Hlutabréfaverð flugfélagsins Play fór aftur undir eina krónu í dag er gengi þess lækkaði um 9% í örviðskiptum.
Gengi flugfélagsins fór undir eina krónu á hlut í lok október en tók síðan að hækka á ný í byrjun nóvember. Dagslokagengi Play var 0,99 krónur í dag og hefur gengið lækkað um 49% síðastliðinn mánuð.
Hlutabréfaverð Oculis hélt áfram að lækka í viðskiptum dagsins en eftir miklar hækkanir í októbermánuði hefur gengi félagsins verið að færast niður á við í nóvember.
Gengi Oculis lækkaði um rúm 4% í viðskiptum dagsins og hefur gengið lækkað núna um 12% frá nóvembermánuði. Dagslokagengi Oculis var 2160 krónur og hefur það hækkað um 28% á árinu.
Hlutabréfaverð Reita leiddi hækkanir á aðalmarkaði er gengi fasteignafélagsins fór upp um 4% og var dagslokagengið 104 krónur. Gengi félagsins hefur ekki verið hærra í rúm tvö ár en félagið birti árshlutauppgjör eftir lokun markaða í gær.
Langmesta veltan var með bréf Marels en gengi félagsins var óbreytt í 600 krónum eftir 1,9 milljarða króna viðskipti.
Heildarvelta á markaði var 5,3 milljarðar og lækkaði úrvalsvísitalan um 0,29%.
