Leiga á íbúðarhúsnæði innan Bretlands hefur aldrei hækkað jafn hratt og á þessu ári. Háir stýrivextir hafa hægt verulega á fasteignasölum í landinu og því sitja seljendur uppi með eignir til lengri tíma.
Samkvæmt nýjum göngum frá leigumiðlarafyrirtækinu Hamptons hefur leiga á nýbyggðum íbúðum hækkað um 12% það sem af er ári sem er það mesta síðan mælingar hófust.
Meðalleiga á mánuði í ágúst var 1,304 pund sem samsvarar ríflega 220 þúsund krónum sem er um 20 þúsund króna hækkun á innan við ári.
Aneisha Beveridge, greiningaraðili hjá Hamptons, segir ný met slegin í hverjum mánuði. Leiga hefur hækkað meira á síðustu 12 mánuðum en á fjögurra ára tímabili milli 2015 og 2019.
Að hennar mati eru hækkanirnar ósjálfbærar til lengri tíma en staðan er því miður þannig að háir vextir á húsnæðislánum eru að þrýsta verulega á leigusala.
Leigusalar sem hafa lent hvað verst í hækkandi vöxtum hafa brugðist við þeim með því að hækka leiguverð. Beveridge segir að leigusalar séu að þessu til að forðast tap og halda sér floti fremur en að þeir séu að græða á leigjendum.
Á sama tíma hafa háir vextir gert leigjendum enn erfiðari fyrir að kaupa eigið fé en meðalvextir á húsnæðislánum eru komnir yfir 6%.
Búast má við því að stýrivextir hækki enn frekar á fimmtudaginn þegar peningastefnunefnd Englandsbanka kemur saman.
