Íslenskir hlutabréfasjóðir sem opnir eru almennum fjárfestum skiluðu ávöxtun á bilinu 10 til 23 prósent á síðasta ári, að undanskildum sjóðnum Akta Stokkur, í rekstri Akta sjóða, sem skilaði neikvæðri ávöxtun upp á 21,74%.
Þetta er mikill viðsnúningur frá árinu 2023 þegar hlutabréfasjóðir áttu í miklum erfiðleikum með að skila jákvæðri ávöxtun.
Þegar horft er til blandaðra sjóða má sjá að þrír sjóðir á vegum Landsbréfa voru með bestu ávöxtunina á síðasta ári. Þar stendur sjóðurinn Landsbréf – Eignadreifing sjálfbær fremstur í flokki með 15,2% ávöxtun.
Eins og nafnið gefur til kynna leggur sjóðurinn áherslu á „eflingu umhverfislegra og/eða félagslegra þátta ásamt því að tilskilið er að góðum stjórnarháttum sé fylgt meðal félaga sem fjárfest í“ eins og segir á vefsíðu Landsbréfa um sjóðinn.
Þegar litið er til ávöxtunar skuldabréfasjóða til meðallangs tíma á árinu 2024, má sjá að Akta sjóðir voru með tvo sjóði sem skiluðu mestri ávöxtun. VaxtaTækifæri skilaði 17,83% ávöxtun, en eignasafn sjóðsins inniheldur bæði fyrirtækja- og ríkisskuldabréf.
Þá skilaði Akta Ríki 12,44% ávöxtun. Skammt á eftir koma tveir sjóðir á vegum Landsbréfa, einn sjóður á vegum Stefnis og tveir sjóðir á vegum Íslandssjóða.
Þegar litið er til síðastliðinna fimm ára nemur nafnávöxtun sjóða í flokknum á ársgrundvelli að meðaltali 3,8%. Mest er hún hjá Akta VaxtaTækifæri, eða 6,33%. Þar á eftir kemur Kvika – Innlend skuldabréf með 5,70% og fyrirtækjaskuldabréfasjóður Landsbréfa með 5,47% ávöxtun.
Stærsti sjóðurinn í flokki langra skuldabréfa er IS Ríkisskuldabréf, í rekstri Íslandssjóða, með 16,9 milljarða í stýringu.
Í þeim flokki skuldabréfasjóða er frekar lítill munur á ávöxtun sjóðanna, sérstaklega þegar litið er til ársins 2024. Þar voru sjóðir á vegum Landsbréfa, Íslandssjóða og Stefnis með á bilinu 6,66-6,87% ávöxtun á árinu. ÍV Ríkisskuldabréfasjóður á vegum Íslenskra Verðbréfa skilaði þá 4,90% ávöxtun.
Fjallað er um málið í nýju tímariti Frjálsrar verslunar. Hægt er að kaupa eintak hér en áskrifendur geta nálgast efni úr tímaritinu hér.
