Bjarkey Olsen Gunnarsdóttir, formaður fjárlaganefndar og ein mikilvægasta kona íslensks samtíma, er manna líklegust til að þess að færa Ísland aftur til ársins 1972 þegar krumlur ríkisins voru allt umlykjandi um efnahagslífið og veröldin var í sauðalitunum meðan hárprúð ungmenni gengu um Hallærisplanið í Álafossúlpum. Tý finnst Bjarkey hafa átt stórleik í kjölfar þess að Costco og fleiri matvörukeðjur kynntu að þau hygðust nýta sér heimildir í lögum til þess að selja fullorðnu fólki áfengi á samkeppnishæfum kjörum. Eins og allir vita hefur sala áfengis verið almenn hér á landi og það má nálgast í matvörubúðum á Leifsstöð, í Staðarskála og á fjölda vefverslana um heim allan.
Innreið Costco og annarra stórmarkaða inn á þennan markað bætir ekki miklu við í þessum efnum en verður vafalaust síðasti naglinn í líkkistu einkasölu ríkisins á áfengi. En baráttukonan Bjarkey ber hausinn við steininn eins og enginn sé morgundagurinn.
***
Týr hafði sérstaklega gaman af því að fylgjast með framgöngu Bjarkeyjar í Kastljósinu fyrir viku. Þar lét hún eftirfarandi gullmola falla:
„Við höfum í þessa litla landi ekkert með það að gera að mínu viti að víkka eða fjölga stöðum sem selja áfengi.“
Og enn fremur:
„Við erum pínulítil, við erum örþjóð. Það eru nægilegar margar búðir ÁTVR sem selja áfengi á landinu. Við þurfum ekki útvíkka þannig að þetta endi í búðum eins og víða er gert. Við sjáum bara vandamálin mjög víða í Evrópu.“
***
Týr getur vitnað um að Bjarkey þekki vel til stöðu mála í Evrópu enda var hún meðal þeirra þingmanna sem ferðuðust til útlanda fyrir tæpan milljarð króna í fyrra.Þannig sást til hennar á Saga Class á dögunum. Að sjálfsögðu sötraði þingmaðurinn hvítvín enda þurft að fá eitthvað styrkjandi eftir að hafa upplifað hið nöturlega ástand lýðheilsumála í Frakklandi.
Týr er fastur dálkur í Viðskiptablaðinu og vb.is.
