Í vikunni fékk grútmáttlaus vinstri stjórn Vinstri grænna, Framsóknar og Sjálfstæðisflokks nýtt líf er Bjarni Benediktsson skipti um ráðuneyti við verðandi arftaka sinn í formannsstóli flokksins, Þórdísi Kolbrúnu Reykfjörð Gylfadóttur.
Hrafnarnir flugu að sjálfsögðu á vit ævintýranna og voru viðstaddir ríkisráðsfund þar sem gengið var frá stólaskiptunum. Að fundi loknum freistuðu fjölmiðlar þess að ná tali af ráðherrunum og þar á meðal nágranna og helsta bandamanni majónesstofnunar Páls Gunnars Pálssonar í Borgartúni, Svandísi Svavarsdóttur.
Vakti það athygli viðstaddra að Svandís neitaði Morgunblaðinu um viðtal en var til í að veita ríkismiðlinum RÚV viðtal, en eins og þekkt er orðið hefur Svandís verið í eldlínunni vegna afskipta sinna af hvalveiðum og útgerðarfélögum.
Dálæti Svandísar á ríkisrekstri kom bersýnilega í ljós á tíma hennar í heilbrigðisráðuneytinu, en hún hefur greinilega gengið skrefinu lengra og tekið þann pól í hæðina að tala aðeins við ríkisrekna fjölmiðla.
Huginn og Muninn er einn af skoðanadálkum Viðskiptablaðsins. Þessi pistill birtist fyrst í nýjasta tölublaði Viðskiptablaðsins.
