Hlutabréf Unity Software, félag Davíðs Helgasonar, hækkuðu mest um 10% í dag þar sem hvert bréf var virði 99 Bandaríkjadali. Félagið var skráð í kauphöll New York 18. september síðastliðinn. Útboðsgengið var 52 Bandaríkjadalir og hefur virði hlutabréfanna því hækkað um 90% síðan þá.
Sjá einnig: Unity verðmætara en öll kauphöllin
Áður en félagið var skráð á markað hafði útboðsgengið verið hækkað ítrekað. Upphaflega stóð til að verðbilið yrði 34-42 Bandaríkjadalir sem var síðan hækkað í 44-48 dali og síðan enn fremur í 52 dali.
Fyrir þremur dögum, þegar bréf félagsins voru virði um 90 Bandaríkjadali, taldi fjárfestingabankinn D.A. Davidson & Co að virði hvers hlutabréfs væri um 100 Bandaríkjadalir.
Hlutur Davíðs verðmætari en öll kauphallar félögin fyrir utan Marel
Í dag fór markaðsvirði félagsins hæst í tæplega 26 milljarða Bandaríkjadali, andvirði um 3.600 milljarða króna. Davíð Helgason, einn af þremur stofnendum félagsins, á um fjögur prósenta hlut í félaginu eða um 10,4 milljónir hluta. Miðað við hæsta gengi bréfanna var hlutur hans virði um 144 milljarða króna.
Hlutur Davíðs er því verðmætari en öll félögin sem skráð eru í kauphöll Íslands fyrir utan Marel. Næst verðmætasta félagið í íslensku kauphöllinni er Arion banki, eftir lokun markaða í dag var bankinn virði um 128 milljarða króna. Markaðsvirði Marel var um 517 milljarðar króna.