Kaup Michelle Ballarin og félags henni tengdri á eignum þrotabús WOW air hefur verið rift. Þetta staðfestir Þorsteinn Einarsson, annar skiptastjóri WOW air í samtali við Morgunblaðið í dag.
Hann segir jafnframt að viðræður við fleiri aðila um kaup á eignunum standi yfir. Hann segir talsverðan áhuga á eignunum, ekki síst þeim sem tengist viðhaldsmálum Airbus-flugvéla en WOW air átti talsverðan lager varahluta og búnaðar sem tengdist viðhaldi flugflota félagsins.
Þorsteinn segir þau verðmæti vel seljanleg á alþjóðlegum markaði og að unnið sé að koma þeim í verð.